Satish Sahu

Yeh App Kyun Banayi

Yeh app Hit Shri Pujya Swami Premanand Ji Maharaj se prerit hoke banayi gayi hai.

Main adham hoon, better banne ki koshish kar raha hoon. Pehle main nasho mein lipt tha. Magar Maharaj ji ki kripa se main adhyatm marg pe chal pada. Naam jap karne se jo changes aaye mere andar, shabdon mein bayan nahi kar sakta.

Indriyon pe control aaya. Mera vivek jagrit hua. Gusse pe bahut control aa gaya hai.

Problem Jisne Is App Ko Janam Diya

Maine jap ke liye counters kharide, lekin har jagah saath le jaana possible nahi tha. Kabhi kabhi toh bhool bhi jaata tha.

Tabhi mere mann mein aaya ki mobile toh har jagah le jaata hoon. Kya isi se jap ki counting ho sakti hai? Play Store pe dekha, kuch apps mile. Lekin zyaadatar ya toh ugly the ya unme woh features nahi the jo mujhe chahiye the.

Isliye socha ek aisi app honi chahiye jo mere 1 crore naam jap ke target ko poora kar sake. Isliye Jaapak banana ka prayaas kiya.

Banane Mein Kya Laga

Har ek chhote se chhote feature ko add karne mein, debug karne mein kai raaton ki mehnat lagi. Poori app banane mein lagbhag 6 mahine lage.

Shuruwaat mein maine ye sirf apne liye banana chaha. Personal use ke liye. Lekin jaise jaise features add karta gaya, mujhe laga ye ek all-in-one app ban sakti hai dusre mere jaise jaapaks ke liye bhi.

Aapke Liye

Isliye maine ye app sabke liye publish ki, taaki sabhi sadhak iska fayda le sakein.

App poori tarah free hai. Kuch ads hain jo server maintenance aur app ko chalane ki cost cover karte hain.